捲入床照風波的阿嬌，自從二月底公開露面後，即全面停工，並向外宣稱進修。直至昨日下午二時半，據稱身在外國的阿嬌卻在助手陪同下，現身中環歌賦街，並步入早前古巨基與緋聞女友曾幫襯的傢俬店addiction。小休多時的阿嬌，身形明顯較前大了一個碼，身穿白色Tee、灰色運動褲加鮮紫色波鞋的她，腰身渾圓。她的一頭長髮蓬鬆地披在肩上，戴上墨鏡及口罩，不時刻意地以頭髮遮面，不欲被人認出的樣子。阿嬌打扮隨意，但依然戴被傳是與Juno的定情鑽戒。

    阿嬌進入店內，先看跳字鐘，再拿起以香蕉砌成的水果盤欣賞。行了約十分鐘後，她一度拿出銀包，未知是否選中心頭好而付錢，其後助手發現記者，二人馬上急急腳跳上停在門口的保母車，並立即縮低以防被攝入鏡內。

    對於阿嬌在香港亮相，其經理人霍汶希（Mani）說：「我一直都冇講佢去邊度進修，其實阿嬌係香港進修，佢學緊跳舞、英文同功夫，稍後先會出埠。（阿嬌睇傢俬喎？）係呀！佢租約期滿，要搵屋搬。（佢好似肥喎？）阿嬌依家投入學業，可能佢出道以來日日休息只得幾個鐘，呢排多些休息所以肥都無可厚非。（阿嬌同Juno戀情發展成點？）都係外界傳！好無辜！」而昨日與阿嬌同行的助手大嬸說：「阿嬌大半年前訂貼紙，所以佢返去拎，拎完就返屋企！」

    阿澤睇好隨時反彈此外，杜汶澤接受內地訪問時表示，睇好阿嬌依然充滿潛力：「做藝人就好比股票，只要公司操作得好，隻股票又好有潛力，暫時跌一下都冇關係，阿嬌呢隻股一定會升。」而梁洛施則像停了牌的股票：「停牌股票一定有大動作，可能係嫁豪門或簽新公司，都講唔定，一半半。」雖然身為梁洛施契爺，但阿澤表示他不會干預對方做任何決定，只再建議她以和為貴。