03年憑《衝上雲霄》一劇上位的吳卓羲，短短兩年躍升為無綫「一線」小生，拍電視劇、電影、出唱片瓣瓣掂，可惜當事人唔珍惜，負面新聞排山倒海，終於被無綫放逐到內地拍劇以示教訓，知衰的吳卓羲即主動要求與TVB加簽8年賣身契，務求可以力挽谷底事業，為求自保，近日吳卓羲更頻頻主動出擊，黐實潮藝老闆陳百祥（阿叻）搏反彈，上星期更陪對方到旺角金魚街歎茶，全程陪笑，真係用心良苦。
自去年4月有傳吳卓羲向古天樂借錢唔還因財失義後，臭名遠播，無綫亦因此對他半放棄，由金笸籮變身為棄將，唱片冇得出，以往獨攬男主角位置的情況已一去不再，去年尾拍攝新劇《少年四大名捕》亦以林峰掛頭牌，戲份被削減，就連陳鍵鋒和馬國明的戲份都較吳卓羲為多。雖然仍得樂小姐寵愛，無奈恨鐵不成鋼，唯有冷淡對待這位昔日愛將，另捧聽話戒花弗的林更上一層樓，而去年才為無綫加簽8年賣身契的吳卓羲只好靠自己有限的人脈關係，去巴結一眾娛圈前輩，希望翻生重登一哥之位。
陪阿叻B哥打牙骹
上星期，記者發現吳卓羲得到前唱片公司師兄鍾鎮濤（B哥哥）帶挈，可以跟叻哥在旺角金魚街的茶餐廳食午餐，同還有一眾叻哥的朋友，一行六人叫了美食，由鐵板牛扒到咖喱雞，眾人食得津津有味。
現場所見，邊食邊發表個人偉論的阿叻，愈說愈興奮，而坐在他對面的B哥哥則負責補充附和，吳卓羲呢？全程陪笑兼點頭和應，當阿叻談到有關飼養烏龜的話題時，吳卓羲更笑到失控，反應十分誇張，看似對吳卓羲的奉承表現十分受落的阿叻，更加愈講愈High，又得！
其實吳卓羲靠黐上位早有先例，當年仍是舞蹈藝員的他，因黐住古天樂而得對方幫忙，由月薪只得數千元的Dancer變為無綫包薪藝員，從此平步青雲，紅遍港九新界。
見記者卻步
食飯打牙骹足兩小時，阿叻率先步出餐廳，吳卓羲與B哥哥則緊隨其後，見有記者在場拍照，阿叻雖感愕然，但仍笑笑口任影，吳卓羲卻一臉尷尬，還刻意退縮在B哥哥身後迴避鏡頭，見阿叻準備上車，吳卓羲即一個箭步衝上前跟阿叻道別，表現恭維有禮，還目送阿叻的座駕離開。
見記者仍窮追不捨地拍照，吳卓羲才笑笑口主動跟記者報告行蹤，他說：「我食完飯返屋企，唔去街喇，《學警》要拍到6月中先煞科。」記者發現吳卓羲前年10月購入、價值40萬的白色日產Fairlady Z跑車早已停泊在門外，但他仍選擇陪B哥哥在街上等車等足十分鐘，送走埋B哥哥才施施然上車離開。
